Монгол Улсын ургацын баланс 40 хувиар буурчээ

Өнөөдөр, 13:19

Хүнс, хөдөө аж ахуй, хөнгөн үйлдвэрийн сайд Ж.Энхбаяр ургац хураалтын урьдчилсан дүнгийн талаар Засгийн газрын хуралдаанд танилцууллаа. Түүний мэдээлснээр, 2025 онд улсын хэмжээнд нийт 745.1 мянган тонн ургац хураан авчээ.

Үүнээс:

Үр тариа 274.1 мянган тонн (үүнд 252.3 мянган тонн улаанбуудай),
Төмс 101.9 мянган тонн,
Хүнсний ногоо 208.6 мянган тонн,
Тэжээлийн ургамал 133.3 мянган тонн,
Тосны ургамал 27.2 мянган тонн байна.

Энэ нь өнгөрсөн онтой харьцуулахад 503.3 мянган тонноор буюу 40.3 хувиар буурсан үзүүлэлт юм. Тодруулбал, улаанбуудай 34.7 хувь, төмс 22.9 хувь, хүнсний ногоо 22.0 хувь, тэжээлийн ургамал 46.0 хувь, тосны ургамал 49.0 хувиар тус тус буурчээ. Ингэснээр дотоодын ургацаар хүн амын хэрэгцээг хангах түвшин улаанбуудайн хувьд 62.5 хувь, төмсний 76.9 хувь, хүнсний ногооны 72.6 хувь байхаар тооцоолж байна.

Ургац буурахад байгалийн хүндрэлтэй нөхцөл нөлөөлсөн байна. Тариалангийн бүс нутгуудад энэ оны 5-7 дугаар сард хур тунадас бага, агаарын дундаж температур 37-39.5 хэм, хөрсний гадаргын үнэмлэхүй их температур 65–69.6 хэмд хүрчээ. Хөрсний 40 хэмээс дээш халсан өдрийн тоо 7-10 хоногоор үргэлжилж, гангийн улмаас ургамлын ургалт муудахын зэрэгцээ усархаг бороо, мөндөр зэрэг байгалийн давагдашгүй үзэгдлүүд тохиолдсон байна.

Гэсэн хэдий ч улаанбуудайн хувьд 8-9 дүгээр сард цаг агаар харьцангуй тогтвортой байсан нь ургацын чанарт эерэгээр нөлөөлж, хураалтыг 7-10 хоногийн өмнө эхлүүлэх боломж олгожээ. Үүний үр дүнд тарианы болц жигд, цавуулаг чанар өндөр гарсан байна.

Засгийн газраас хүнсний улаанбуудайн стратегийн болон 2026 онд тариалах үр тариа, төмс, тэжээлийн таримлын үрийн нөөцийг бүрдүүлэх, байгалийн эрсдэлийг бууруулах цогц арга хэмжээний төлөвлөгөө боловсруулж хэрэгжүүлэхийг сайд Ж.Энхбаярт даалгав. Мөн тариалангийн аж ахуйн нэгжүүдийн зээлийн эргэн төлөлтийн хугацааг хойшлуулах асуудлыг судлан шийдвэрлэхээр боллоо.

Сэтгэгдэл

АНХААРУУЛГА: Уншигчдын бичсэн сэтгэгдэлд skhd.nutag.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.

Songino.nutag.mn

Монгол Улсын ургацын баланс 40 хувиар буурчээ